ശ്രീനാരായണ ഗുരു സ്വാമികളുടെ മാഹാത്മ്യം തിരിച്ചറിഞ്ഞ കവി ശ്രീ പന്തളം കെ.പി. രാമന്‍പിളള ഭക്തി പാരവശ്യത്താല്‍ എഴുതിയ ഒരു കവിതയാണ് ഇവിടെ കൊടുത്തിരിക്കുന്നത്.NSS (നായര്‍ സര്‍വീസ് സൊസൈറ്റി) നേതൃത്വം ഈ കവിത പാടി നടന്നാണ് പൊതുജനങ്ങളില്‍നിന്നും പണ്ട് ഉല്‍പ്പന്ന പിരിവു നടത്തി പ്രസ്ഥാനങ്ങള്‍ പടുത്തുയര്‍ത്തിയത്.
അഖിലാണ്ഡമണ്ഡലമണിയിച്ചൊരുക്കി
അതിനുള്ളിലാനന്ദ ദീപം കൊളുത്തി
പരമാണുപ്പൊരുളിലും സ്ഫുരണമായ് മിന്നും
പരമപ്രകാശമേ ശരണം നീയെന്നും
സുരഗോള ലക്ഷങ്ങളണിയിട്ടു നിര്‍ത്തി
അവികല സൗഹൃദബന്ധം പുലര്‍ത്തി
അതിനൊക്കെയാധാരസൂത്രമിണക്കി
കുടികൊള്ളും സത്യമേ ശരണം നീയെന്നും
ദുരിതങ്ങള്‍ കൂത്താടുമുലകത്തില്‍ നിന്റെ
പരിപൂര്‍ണ്ണ തേജസ്സു വിളയാടിക്കാണ്മാന്‍
ഒരു ജാതി ഒരു മതമൊരുദൈവമേവം
പരിശുദ്ധ വേദാന്തം സഫലമായ് തീരാന്‍
അഖിലാധി നായകാ തവ തിരുമുമ്പില്‍
അഭയമായ് നിത്യവും പണിയുന്നു ഞങ്ങള്‍
സമരാദി തൃഷ്ണകളാകവേ നീക്കി
സമതയും ശാന്തിയും ക്ഷേമവും തിങ്ങി
ജനതയും ജനതയും കൈകോര്‍ത്തിണങ്ങി
ജനിത സൗഭാഗ്യത്തിന്‍ ഗീതം മുഴങ്ങി
നരലോക മെപ്പേരുമാനന്ദം തേടി
വിജയിക്ക നിന്‍ തിരുനാമങ്ങള്‍ പാടി
Thanks
ReplyDelete